評測!MAMMUT DUCAN SPINE背包

圖/文:Eric Songbill Wong

 

於戶外探險工作,讓我深深明白到一件優質嘅戶外裝備係非常重要。我選購裝備其中一個原則就係「貴精不貴多」,好嘅裝備可以經得起多年嘅風雨歷練,就好似我件Nordwand Hardshell Pro咁,雖然貴,但我著左5年經歷過百次嘅極地遠征,件Hardshell依然絲毫無損,仲可以拎上手同人講可歌可泣嘅探險故事,除返開個價錢簡直係物有所值。

 

作為裝備王,每年我都會留意歐洲嘅ISPO戶外裝備展覽,睇下有咩最新黑科技產品,而The ISPO Award就係頒獎比一啲喺設計上得到最頂級評價嘅戶外裝備,而係2020年Mammut就推出左一個Ducan Spine Backpack 28-35L,並且嬴左幾個獎項。2021年更加係Carryology網站評the Best Active Backpack.

雖然疫情期間未能出國攀山,但留喺香港都有其他野玩,用左呢個Backpack幾個月去左攀石、探洞、行山,親身測試左呢個Backpack到底係咪值得擁有ISPO嘅獎項。

 

Ducan Spine 最大嘅賣點就係同奧地利維也納應用科技大學聯手研發嘅「動態脊柱技術」Active Spine專利,backpack可以貼合軀幹並隨身體擺動,令到肩膊上嘅負重平均分散,係長時間長距離嘅行山活動入面,或者身體需要大幅伸展攀登嘅時侯,為你節省體力消耗。個人認為呢個袋其實好適合露營、攀石或者海外行山用,特別係應付高海拔嘅高山徒步,例如珠峰大本營EBC 、日本富士山、台灣玉山等等,令你行山嘅時候冇咁辛苦。

28-35L可以裝哂大部分露營用品,而係攀石方面,Trad Climb 所用到嘅安全裝備攀山繩等等都可以放哂入去,仲有好多位剩。同無Active Spine嘅其他袋比較,個人覺得個袋輕左25%到,而且Mammut重新設計嘅Waist Pad 比較凸出,令到個身體同個袋更加貼身,減低長時間背負嘅不適。

除左Active Spine技術之外,我好鐘意呢個Backpack 有好多唔同嘅小細節,近年好多日本山系牌子都會喺Backpack度加一個可拆除嘅收納袋仔,比你掛喺袋嘅唔同位置,而Mammut亦都唔例外,係腰帶上加咗個防水Sacoche比你放貴重物品,例如電話銀包信用卡,唔鐘意掛喺側面亦都可以掛係胸前,方便你隨時拎電話影相

最後仲有一個設計我都好鐘意,就係佢有好多小型收納位置,比你放唔同嘅小物品。我數過成個袋總共有5個收納位,而我就好鐘意將唔同嘅物品分類放。例如急救用品,求生刀會放係頂袋,零食放係腰帶側袋,貴重物品放喺Sacoche等等,咁喺搵野嘅時候就會方便好多。

 

肩帶兩側有個網袋好有用,可以放大陽眼鏡同250ml水樽,其他品牌好少有呢個設計。

主袋前方有個大拉鍊方便拎係底既野,唔洗係rolltop上面伸手落底搵。

 

Ducan Spine Backpack絕對係一個全能型既袋,難怪嬴到咁多獎項。如果我要為個袋評分嘅話,我認為呢個袋值9/10 ,差一分就係我唔太鐘意佢用魔術貼固定行山杖。如果可以換上索帶會更好。(其實只係我個人純粹唔鐘意魔術貼嘅感覺)

MAMMUT Ducan Spine 28-35L Backpack總評:

露營(非常推薦)

長徙行山(非常推薦)

攀石(非常推薦)

探洞(完全不推薦) 因為太污糟,返屋企個袋洗左好耐,好心痛。

 

 

<  完  >